მთავარი სიახლეები სააგენტოს „აწარმოე საქართველოში“ ცვლილებები შევიდა და ახალი მექანიზმები დაემატა

სააგენტოს „აწარმოე საქართველოში“ ცვლილებები შევიდა და ახალი მექანიზმები დაემატა




ბიზნესის ხელშეწყობის გასაძლიერებლად, სააგენტო  „აწარმოე საქართველოში“ აგრძელებს კერძო სექტორის მხარდაჭერას. სააგენტოში განხორციელებული ცვლილებების შედეგად, ემატება და იზრდება ხელშეწყობის მექანიზმები.

ბიზნეს უნივერსალი

• პროგრამის მოქმედების ვადა გახანგრძლივდა ერთი წლით. განაცხადების მიღება განახლდება 2022 წლის 3 იანვარს და 2022 წლის 15 დეკემბრამდე გაგრძელდება.

• პროგრამაში სუბსიდირებული სესხის გაცემა შეეძლებათ საინვესტიციო ფონდებს.

• სასტუმროს მინიმალური ნომრების რაოდენობა 10 დან 5-მდე მცირდება.   

• ევროკავშირის საპილოტე რეგიონების პროგრამის ფარგლებში საპილოტე რეგიონებში (იმერეთი, გურია, კახეთი, რაჭა-ლეჩხუმ ქვემო სვანეთი) 50 000 ლარიდან 1 500 000 ლარამდე სესხის/ლიზინგის მოცულობის შემთხვევაში ყველა ბენეფიციარი 10%-იანი გრანტით ისარგებლებს, ხოლო ბიზნეს ექსპორტის კოდებზე გრანტი შეადგენს 20%-ს.

სასტუმრო ინდუსტრიის განვითარება

„სასტუმროსა და ბალნეოლოგიური კურორტების ინდუსტრიის“ მონაწილე ბენეფიციარებს, პანდემიის გათვალისწინებით, ოპერირების დაწყების ვალდებულება გადაუვადდებათ ერთი წლით.

საკრედიტო საგარანტიო მექანიზმი

პროგრამის მოქმედების ვადა გახანგრძლივდა ერთი წლით. განაცხადების მიღება განახლდება 2022 წლის 3 იანვარს და 2022 წლის 15 დეკემბრამდე გაგრძელდება. ამასთან, სესხის უზრუნველყოფის გარანტიის მოცულობა 90%-დან 80%-მდე შემცირდა.

მიკრო და მცირე მეწარმეობის ხელშეწყობის საგრანტო პროგრამა

• მომავალი წლიდან პრიორიტეტი მიენიჭება შშმ პირთა მიერ ბიზნესის წამოწყებას და არსებული გაფართოებას, ასევე ახალგაზრდა მეწარმე სუბიექტის მიერ  ბიზნესის წამოწყებას და არსებული ბიზნესის გაფართოებას. 

• ამასთანავე, ევროკავშირის მხარდაჭერით, საპილოტე რეგიონებში (იმერეთი, კახეთი, გურია, რაჭა-ლეჩხუმ ქვემო სვანეთი) გაიზრდება გრანტის მოცულობა, კერძოდ გახდება 40 000 ლარი. დანარჩენ რეგიონებში იქნება 30 000 ლარი.

• აღსანიშნავია, რომ 2022 წლის რაუნდში მონაწილეობის უფლება არ აქვთ 2020 წლის რაუნდის ფარგლებში დაფინანსებულ ბენეფიციარებს.

პროგრამა „გადაიღე საქართველოში“

პროგრამის მოქმედების ვადა გახანგრძლივდა ერთი წლით. განაცხადების მიღება განახლდება 2022 წლის 3 იანვარს და 2022 წლის 15 დეკემბრამდე გაგრძელდება.

ექსპორტის ტექნიკური დახმარების ნაწილი

სააგენტოს „აწარმოე საქართველოში“ ექსპორტის მხარდაჭრის მიმართულებას დაემატა ახალი კომპონენტი. პროგრამა შედგება სამი კომპონენტისაგან:

• პროდუქტის ლიცენზირება/სერტიფიცირება, რომლის დაფინანსების მოცულობა განისაზღვრა 20,000 ლარით. აღნიშნული მოიცავს საწარმოს აუდიტის საერთაშორისო სტანდარტის დანერგვას; ხარისხის დამადასტურებელი საერთაშორისო სერტიფიკატის მოპოვებას და მეწარმე სუბიექტის მიერ წარმოებული პროდუქტის ლიცენზირებას.

• ბრენდინგი/პროდუქციის შეფუთვა, რომლის დაფინანსების მოცულობა განისაზღვრა 20,000 ლარით.

• საერთაშორისო გაყიდვების სტიმულირება, რომელიც საერთაშორისო სავაჭრო ქსელში  შესვლის ხელშეწყობას გულისხმობს.აღნიშნულის დაფინანსების მოცულობა - 10 000 ევრო ექვივალენტი ეროვნულ ვალუტაში.

 

ონლაინ ჩატი
×