გაიცანით ქართული კომპანიის "ჩაკ რულო"-ს დამფუძნებლები - ლევან ტურძელაძე და ლევან ჩიკვაიძე.
ბიზნესის წამოწყების მთავარი იდეა და საიდან წამოვიდა მისი შექმნის ინსპირაცია?
„ჩაკ რულო“-ს შექმნის იდეა პირველად 2017 წელს გაჩნდა. გვინდოდა შეგვექმნა ფართო მოხმარების პოტენციალის მქონე, ხარისხიანი ალკოჰოლური სასმელი, რომელსაც ქართული აუთენტური ხასიათი ექნებოდა. მაშინვე დავარეგისტრირეთ კომპანია, თუმცა მას შემდეგ დიდხანს ვიმუშავეთ როგორც პროდუქტზე, ისე ბრენდზე.
საბოლოოდ, 2020 წლის მიწურულს, საქართველოს ბაზარზე გამოჩნდა მუქი ფერის ყურძნის ჭაჭა - Charles Rullo, იგივე ჩაკი.
რითი არის გამორჩეული თქვენს მიერ წარმოებული პროდუქტი და სად ხდება მისი რეალიზაცია?
„ჩაკ რულო“ გახლავთ უნიკალური სინთეზი - 40%-იანი რქაწითელის ყურძნის დისტილატის და ნატურალური შავი სტაფილოსი, რაც მას ვიზუალურად მიმზიდველს, რბილად დასალევს და განსაკუთრებით არომატულს ხდის.
იგი სასიამოვნოა, როგორც პირდაპირ დასალევად, ასევე ძალიან პოპულარულია სხვადასხვა კოქტეილისთვის სამუშაო ბაზად, რაც ძირითადად ქართული მაღალალკოჰოლურ სასმელებს ახასიათებს. ამასთან აღსანიშნავნია მისი საინტერესო ბრენდის იდენტობაც, რაც ძალიან მიმზიდველს ხდის მომხმარებლისთვის.
ბრენდი ერთი წელიც არ არის რაც გაეშვა და ადგილობრივი ბაზრის „HORECA” სექტორში უკვე საკმაოდ კარგად არის წარმოდგენილი. ასევე, შეგხვდებათ რამდენიმე ქსელში და ამ მიმართულებით უფრო მეტად ვაპირებთ განვითარებას.
კომპანიის სამომავლო გეგმები და როგორ ფიქრობთ რამდენად დაგეხმარათ ექსპორტის მენეჯმენტის კურსი მისი სამომავლო განვითარებისთვის?
ჩვენს პროდუქტს აქვს პოტენციალი ახალი სიტყვა თქვას საერთაშორისო ბაზარზე და ვაპირებთ ეტაპობრივად ექსპორტის მიმართულებით მუშაობას.
იქიდან გამომდინარე, რომ არცერთ ჩვენგანს არ ჰქონდა ამ მიმართულებით გამოცდილება, საიდანღაც უნდა დაგვეწყო. პატარა მოკვლევის შემდეგ, მეგობრების რჩევით, გავიარეთ სააგენტოს ექსპორტის მენეჯმენტის კურსი, რომლის ფარგლებშიც გავეცანით ისეთ მნიშვნელოვან საკითხებს, როგორებიცაა საექსპორტო ლოგისტიკა, ხარისხის ინფრასტრუქტურა და ბიზნესკომუნიკაციის წარმოება პოტენციურ დამკვეთებთან.
კურსის პროგრამა მაქსიმალურად მორგებულია საბაზრო მოთხოვნებზე. ვფიქრობთ, მივიღეთ ის თეორიული ცოდნა, რომელიც აუცილებლად დაგვეხმარება ჩვენი უნიკალური ბრენდი და პროდუქტი სხვადასხვა ქვეყნის მომხმარებელსაც გავაცნოთ.
